मागील वीस – बावीस वर्षे शिक्षण क्षेत्रातील शाळा व कर्मचाऱ्यांसाठी तसेच शिक्षण क्षेत्रासाठी संघटनेच्या माध्यमातून कार्य करीत असताना गरजू व होतकरू विद्यार्थ्यांसाठी कार्य करण्याची प्रेरणा मा. शिवाजीराव खांडेकर (सर)यांच्या संकल्पनेतून साकार होत असलेली संस्था म्हणजे शिवसमर्थ प्रतिष्ठान शिक्षण आणि शिक्षण क्षेत्र याविषयीची कमालीची आस्था असणारी ही संस्था उद्याला येत आहे. उपेक्षित, वंचित घटकातील विद्यार्थी …उदासिनतेमूळे मुख्य प्रवाहाबाहेर फेकले जात आहेत. गरजू आणि होतकरु विद्यार्थ्यांना आधार देणे हे या संस्थेचे प्राधान्यक्रमाने प्रथम कर्तव्य आहे..ही खांडेकर सरांची उपजत तळमळ आहे. स्वतः खांडेकर सर हे प्रतिकूल परिस्थितीचे चटके सहन केलेले नेतृत्त्व आहे. गगनभरारी घेऊनही मातीशी नाळ असणारा संघटक अशी त्यांची ख्याती आहे. त्यामूळे या संस्थेच्या माध्यमातून गरजू व होतकरु विद्यार्थ्यांना आधार मिळणार आहे. स्पर्धा परीक्षेच्या माध्यमातून स्वतःला सिध्द करु पाहाणाऱ्या अनेक प्रज्ञावान युवकांना यातून आर्थिक पाठबळ दिले जाणार आहे. मा. शिवाजीराव खांडेकर (सर) हे राष्ट्र सेवा दलाच्या मुशीतून घडलेले प्रगल्भ आणि विवेकी नेतृत्व आहे. विद्यार्थ्यासाठी समर्पित भावनेने काम करणाऱ्या गुरुजनांविषयी त्यांच्या मनात आदराची, आपुलकीची भावना आहे. प्राथमिक, माध्यमिक व उच्च माध्यमिक शाळांमध्ये समर्पित भावनेने कार्य करणाऱ्या शिक्षकांचा व शिक्षकेतर कर्मचाऱ्यांचा यथोचित सन्मान करुन..त्यातून समाजाला प्रेरणा देणे हा संस्थेचा प्रमुख उद्देश आहे. त्याचबरोबर विनाअनुदानित तत्त्वावर शासनाचा एकही रुपया पगार नसताना विद्यार्थ्यांसाठी अतुलनीय काम करणाऱ्या निवडक शिक्षक व शिक्षकेतर कर्मचारी यांना आर्थिक हातभार देऊन मदत करणे. .हा या संस्थेचा उद्देश, आजची गरज सिध्द करणारा आहे.

शिवसमर्थ संस्थेसाठी शिक्षण क्षेत्रातील सर्वांनी मनापासून पाठबळ देण्याची आवश्यकता आहे. या संस्थेचे कार्यक्षेत्र संपूर्ण महाराष्ट्र राज्य आहे. क्रियाशील सभासदत्वाच्या माध्यमातून आपण या सामाजिक कार्यात सहभागी होऊ शकता. प्रत्येकांनी मदतरुपी खारीचा वाटा उचलला तर राज्याला अभिमान वाटावा..असे कार्य या संस्थेच्या माध्यमातून होणार आहे. आपण व्यक्तिगत, हितचिंतक तसेच समाजातील मान्यवर व दानशूर यांचे कडून सहकार्य व मदतीची अपेक्षा. ही विनंती!